Ætlanin er at gera gongugøtuna í miðbýnum bilfría tvær ferðir um árið við tí endamáli at skapa eitt meira livandi og hugnaligt øki til trivnað, samveru og virksemi.

Talan er um Niels Finsens gøtu frá Káta Horninum til og við Vaglið. Hóast gøtan verður stongd fyri almennari ferðslu, verður møguleiki fyri vørukoyring og hýruvognar fáa ávíst øki til sítt virksemi.

Pláss fyri hugnaligum løtum

Ætlanin er, at gongugøtan skal skifta ham alt eftir árstíðini. Í desember eru nógv tiltøk í miðbýnum, eitt nú afturvendandi tiltakið Jól í Miðbýnum, sum savna fólk, og endamálið er at skapa eitt øki, har fólk kunnu hittast og vera. Tí er ætlanin eisini, at skipast skal fyri tiltøkum í gongugøtuni í summar, meðan hon er stongd fyri vanligari ferðslu.

Ein líknandi roynd varð gjørd í 2022. Visit Tórshavn samskipaði tá tiltøk í Vágsbotni. Royndirnar vóru góðar og tað varð sera væl móttikið.

Verkætlanin eftirmetast, áðrenn støða verður tikin til, um bilfríir dagar í miðbýnum skulu halda fram.

Býráðið samtykti málið um bilfríar dagar í miðbýnum á fundi 17. September, og skal aftur viðgerast á næsta býráðsfundi.