Søgurnar hava verið fleiri, og tað vísti seg aftur nú, at tað sjáldan rýkur av ongum brandi.

Í kvøld hevur HB lagt á facebook, at stórtíðindi eru á veg, og eingin ivi er um, at tíðindini eru, at Mikkjal K. Thomassen verður høvuðsvenjari í 2027, og at hann fer at standa á odda fyri besta liðnum næstu árini. Bolt.fo nevndi søguna, sum gekk bein at ganga á, tá ið Víkingur og KÍ spældu steypafinalu, og í kvøld ber portal.fo søguna, sum keldur í HB kjarnuni vátta.

Mikkjal K. Thomassen spældi í síni tíð við HB. Sambært FaroeSoccer var hann í HB fram til og við 1997, tá ið hann skifti til grannarnar í B36. Síðani spældi hann eisini við B68 og EB/Streymi, áðrenn hann varð venjari.

Í 1995 vandi hann kvinnuliðið hjá HB, frá 2009 til 2013 var hann øll árini undantikið 2010 venjari hjá B36, sum vann FM í 2011. Og frá 2015 og fram til 2022 var Mikkjal venjari í Klaksvík. Tað var í hesum árum, at KÍ kom fyri seg aftur og vann steypakappingina í 2016 og meiraraheitið í 2019, 2021 og 2022.

Eftir at hava roynt seg í Fredrikstad í Norra og AIK í bestu svensku deildini er 50 ára gamli Mikkjal aftur í Føroyum, og nú fer hann at standa á odda hjá HB. Sum tað hevur skilst á prátinum, so verður Lukasz Cieslewicz, sum síðani í summar hevur havt ábyrgdina av liðnum, ið av álvara er komið aftur á aldukambin, hjálparvenjari.