Seinnapartin í dag var hátíðarhald á Kommunalu Brennistøðini á Hjalla í sambandi við, at Landleiðin nú fer undir at heinta húsarhaldsrusk við nýggjum el-bilum.

Nýggju bilarnir verða tiknir í nýtslu 1. oktober og eru sostatt eitt nýtt stig í innsavningini av húsarhaldsruski í kommununi.

Tiltakið byrjaði klokkan 14 í fyrisitingarbygninginum hjá Kommunalu Brennistøðini, har Marius Müller, umhvørvisleiðari, beyð teimum møttu vælkomnum.

Eisini vóru røður á skránni. Millum teirra, sum vóru við til hátíðarhaldið, vóru Elsa Berg, borgarstjóri í Tórshavnar kommunu, og Kristianna W. Poulsen, forkvinna í Náttúru- og umhvørvisnevndini.

Kaffi og køka varð bjóðað teimum møttu, áðrenn farið varð út at síggja nýggju innsavningarbilararnar.

Nýggju bilarnir eru merktir við boðskapinum „Nýt vit og skil – 100% EL“, og á síðuni sæst eisini heimasíðan hjá Kommunalu Brennistøðini.

Fleiri av nýggju el-bilunum vóru settir upp á rað uttanfyri Brennistøðina í sambandi við hátíðarhaldið, har eisini varð høvi at taka myndir av nýggja bilaflotanum.