Føroyar innfluttu vørur fyri góðar 11,4 milliardir krónur frá mai 2025 til apríl 2026. Tað eru knappar 1,2 milliardir krónur meira enn undanfarna uppgerðarár.

Nærum hálv milliard afturat

Størsti vøksturin var í innflutninginum av maskinum, motorum, skipum og akførum. Virðið vaks 484,9 milliónir krónur, ella 19,8 prosent, og kom upp í 2,93 milliardir krónur.

Innflutningurin av matvørum og livandi djórum vaks samstundis 370,1 milliónir krónur, ella 16,3 prosent. Serliga nógv vaks innflutningurin av fiski og fiskavørum.

ES og Norðuramerika toga upp

Innflutningurin úr ES vaks 490,9 milliónir krónur, tá ið skip og flogfør ikki verða tald við. Vøksturin kemst serliga av størri innflutningi av oljuúrdráttum og akførum.

Úr Norðuramerika vaks innflutningurin 326,9 milliónir krónur. Sambært Hagstovu Føroya var talan fyri tað mesta um fisk úr Grønlandi.

Einasti høvuðsbólkurin við afturgongd var ídnaðarvørur flokkaðar eftir ráevni.