Stuðulin skal brúkast til eina nýggja verkætlan, sum skal tryggja betri javnvág millum náttúruvernd og vaksandi ferðslu í økinum.

Stuðulin er latin undir skipanini Local Synergy Projects í norðurlendsku náttúruskránni fyri 2026–2027. 

Verkætlanin hevur fingið navnið „Náttúruperlan í Skálafirði“ og byggir á arbeiði, sum byrjaði við einum ástaðarfundi í 2024.

Fuglalív undir trýsti

Ósin í Skálafirði verður lýstur sum eitt serstakt øki við ríkum fuglalívi. Her halda bæði flytifuglar, vetrargestir og staðbundnir fuglar til, samstundis sum økið verður nógv brúkt til útivist og upplivingar.

Sambært Runavíkar kommunu er ferðslan í økinum vaksin nógv seinastu árini. Tað hevur skapt avbjóðingar fyri fuglalívið og varpað ljós á tørvin á verndartiltøkum.

Samstarv um vernd og menning

Kommunan ætlar nú at arbeiða saman við borgarum, hagastýri og serfrøðingum innan fugla- og plantulív fyri at menna og verja økið. Málið er at varðveita eitt av virðismestu náttúruøkjunum í kommununi og samstundis tryggja, at fólk framhaldandi kunnu nýta økið.

Verkætlanin varð fyrst løgd fram fyri borgarum og hagastýrinum í 2024 og fekk síðani undirtøku bæði í tøkni- og umhvørvisnevndini og í býráðnum.