Norðurlond taka nú eitt nýtt stig fyri at styrkja matvøruveitingartrygdina í økinum. Á fundi í Føroyum samtyktu ráðharrarnir at seta á stovn eitt norðurlendskt samstarv millum matvørumyndugleikarnar í londunum.

Fundurin varð hildin 9. og 10. juni í sambandi við formansskapin hjá Føroyum og Danmark í Norðurlendska ráðharraráðnum. Bárður á Steig Nielsen og Jacob Vestergaard leiddu fundin.

Havið í miðdeplinum

Havið var reyði tráðurin á fundinum. Ráðharrarnir umrøddu felags avbjóðingar og møguleikar innan matvøruframleiðslu, tilbúgving, veitingartrygd og burðardygga gagnnýtslu av náttúrutilfeingi. Londini vóru samd um, at tætt samstarv er neyðugt í eini tíð við vaksandi óvissu.

Føroyar lyftu tvey týdningarmikil mál

Stjórin á Heilsufrøðiligu starvsstovuni, Bárður Enni, legði fram føroyskar royndir við tilbúgving á matvøruøkinum. Samstundis greiddi Havstovan frá kanningum av havstreymunum í Atlantshavinum, AMOC, og hvussu broytingar kunnu ávirka fiskastovnar, veðurlag og samfeløg.

Bárður á Steig Nielsen nýtti eisini høvið at minna hini londini á føroyska ynskið um fullan limaskap í Norðurlendska ráðharraráðnum og heitti á tey um at stuðla Føroyum í arbeiðinum við at dagføra Helsingforssáttmálan.