Nú fáa menn eisini høvi at leggja gerandisdagin aftur um seg og brúka eina heila viku til egna vælveru. Lis Helgadóttir og Durita Holm fara í 2027 at skipa fyri einum retreati í Spania, sum burturav er ætlað monnum.
Á skránni eru yoga, andingarvenjingar, hugleiðsla og hvíld. Endamálið er at geva luttakarunum ró í sinnið og nýggja orku í kroppin.
Menninir hava sjálvir biðið um tað
Hugskotið er sprottið úr fleiri áheitanum frá monnum, sum hava ynskt sær eitt slíkt tilboð.
– Aftur og aftur hava menn spurt okkum: „Hví gera tit ikki eitt retreat fyri okkum?“ Nú svara vit, skriva Lis og Durita í einari fráboðan.
Retreatið verður á einum staði við útsýni yvir havið, umleið ein tíma frá Málaga.
Dagarnir byrja við yoga og hugleiðslu. Um middagsleitið eru andingarvenjingar á skránni, meðan seinnapartarnir geva høvi til at svimja, ganga túrar og hvíla seg.
Um kvøldið verða aftur yoga, hugleiðsla og samrøður um ymisk evni.
Skulu læra at handfara strongd
Hvønn dag verður eitt ávíst evni viðgjørt, eitt nú friður, nærvera, umsorgan og dirvi.
Luttakararnir fáa eisini vistfrøðiligan vegetarmat, sum ein kokkur ger.
Sambært fyriskiparunum er ætlanin, at menninir skulu fáa amboð við sær heim, sum kunnu hjálpa teimum at handfara strongd og møta avbjóðingum við størri yvirliti og yvirskoti.
Ongar royndir við yoga ella hugleiðslu eru neyðugar.
Áhugaðir kunnu seta seg í samband við Lis Helgadóttir ella Duritu Holm á Messenger.