Jensen Huang hevur lagt frá sær sum stjóri í amerikanska tøknirisanum Nvidia eftir 33 ár á odda fyri fyritøkuni, sum hann sjálvur var við til at stovna.
Avgerðin kemur eftir skuldsetingar um, at Huang hevur havt eitt samband við eina kvinnu, sum amerikanskir myndugleikar illgruna fyri at hava njósnast fyri Kina.
Sambært CNN hevur nevndin í Nvidia tilnevnt fíggjarstjóran Colette Kress til fyribils stjóra.
Samband við kvinnu undir illgruna fyri njósning
Gølan tók dik á seg, tá tað kom fram, at Huang hevði havt eitt samband við Alice Huang, fyrrverandi stjóran í fyritøkuni Megaspeed í Singapore.
Amerikanskir myndugleikar illgruna hana fyri at hava latið Kina loyniligar upplýsingar og hjálpt til við at smugla framkomnar fløgur til vitlíki inn í landið.
Huang viðgekk um vikuskiftið, at hann hevði verið konu síni ótrúgvur, og bað alment bæði konu sína og fyritøkuna um umbering.
Trýstið á hann vaks, tá tað eisini kom fram, at hann hevði havt eitt samband við ein leiðara í Nvidia.
Partabrævið rapaði – kappingarneytarnir styrktust
Fráboðanin um fráferðina fekk partabrævið í Nvidia at falla meira enn 14 prosent, tá amerikanski partabrævamarknaðurin læt upp hósdagin.
Seinni minkaði fallið til umleið fimm prosent.
Samstundis hækkaðu partabrøvini hjá kappingarneytunum AMD og Broadcom umleið seks prosent.
Nvidia hevur havt ein avgerandi leiklut í menningini av vitlíki og er millum heimsins mest virðismiklu fyritøkur.
Fráferðin hjá Huang skapar nú óvissu um framtíðina hjá tøknirisanum, sum skal leggja nýggjan roknskap fram í næstu viku.
Kelda: CNN Business.
