Ein nýggj ferjuleið fyri ferðafólk og farm millum Aberdeen í Skotlandi og Seyðisfjörð í Íslandi er til umrøðu. Møguleiki er eisini fyri, at ferjan fer at steðga í Hetlandi.

Tað skrivar íslendska kringvarpið RÚV við Shetland Times sum keldu.

Havnarmyndugleikarnir í Lerwick eru sinnaðir at kanna møguleikarnar, men leggja dent á, at nógv arbeiði er eftir, áðrenn ætlanin kann gerast veruleiki.

Umboð fyri havnina í Aberdeen hava longu havt samráðingar við myndugleikarnar í Múlaþing í Íslandi. Ein ónevndur ferjureiðari hevur eisini víst áhuga.

Avgerandi verður, um nóg mikið av farmi verður at flyta. Ferðafólkatalið einsamalt verður ikki mett at vera nóg stórt til at gera eina regluliga ferjuleið fíggjarliga burðardygga.

Norrøna knýtti áður Føroyar, Ísland og Danmark at Bretlandi við steðgi í Lerwick.

Í november 2007 tók Smyril Line tó Hetland av ferðaætlanini.

Nú verður møguleikin fyri einum nýggjum ferjusambandi aftur kannaður.