Tað er vorðið munandi truplari hjá vanligum borgarum at fáa endarnar at røkka saman í fleiri evropeiskum høvuðsstøðum.

Ein nýggj greining frá Tradingpedia avdúkar, at Lissabon í 2026 er minst fíggjarliga atkomuligi høvuðsstaðurin í Evropa fyri støk fólk. Har eru mánaðarligu liviútreiðslurnar mettar til umleið 12.150 krónur, meðan miðallønin eftir skatt er umleið 10.000 krónur. 

Tað merkir, at ein vanligur borgari í miðal manglar pening til at fíggja eitt rímiliga gott lív.

Á øðrum plássi kemur Tirana í Albania, meðan Athen, Warszawa og Róm eisini eru millum teir minst atkomuligu høvuðsstaðirnar.

Keypmannahavn millum teir bestu

Í hinum endanum av listanum liggur Brússel sum mest atkomuligi høvuðsstaðurin í Evropa. Har fara umleið 49 prosent av miðallønini til vanligar liviútreiðslur.

Keypmannahavn er nummar tvey. Ein stakur borgari hevur í miðal liviútreiðslur á umleið 15.800 krónur um mánaðin, men miðallønin eftir skatt er góðar 31.300 krónur. Eftir standa tí meira enn 15.500 krónur til uppsparing ella aðra nýtslu.

Bern í Sveis, Luksemborg og Stokkhólmur eru eisini millum mest atkomuligu høvuðsstaðirnar sambært greiningini.

London er nógv tann dýrasti

Tá ið hugt verður eftir sjálvum prísstøðinum, er London nógv tann dýrasti høvuðsstaðurin í Evropa. Har eru vanligu mánaðarligu útreiðslurnar hjá einum støkum borgara mettar til slakar 27.000 krónur.

Bern, Reykjavík, Amsterdam og Dublin fylgja á næstu plássunum.

Greiningin umfatar 37 evropeisk lond og byggir á tøl um bústað, mat, flutning, persónliga røkt og frítíðarnýtslu, samanborið við miðallønir í høvuðsstøðunum.