Ein nýggj kanning hjá Parentium.fo bendir á, at trygdin á føroyskum heimasíðum er munandi batnað.

Tilsamans hevur Parentium.fo kannað 13.670 vertsnøvn og undirøki fyri møguligar trygdarveikleikar í PHP.

Í kanningini 24. oktober vórðu 70 vertsnøvn skrásett við PHP-útgávum undir rættingarmarkinum. Tveir dagar seinni var talið minkað niður í 24.

Tað er ein minking upp á 65,7 prosent.

Fyritøkur kunnu hava tikið stig

Kristian Eli Zachariasen, sum hevur kunngjørt úrslitini á LinkedIn, skrivar:

– Hetta kann benda á, at føroyskar fyritøkur og hýsingarveitarar hava tikið trygdarveikleikarnar í álvara og eru farnir undir at dagføra sínar skipanir.

Hóast jaligu gongdina er ikki vist, at allar heimasíðurnar eru dagførdar.

Summar upplýsa møguliga ikki longur, hvørja PHP-útgávu tær brúka. Tí prógvar minkingin ikki, at allir veikleikar eru rættaðir.

Parentium.fo undirstrikar, at kanningin er vegleiðandi og verður støðugt ment og betrað.