Sev hevði mikudagin reisigildi í Skálafirði, nú nýggja koblingsstøðin er reist við síðuna av gomlu støðini. Veitarar, arbeiðstakarar og starvsfólk vóru við til hátíðarløtuna.

– Onkrar seinkingar hava verið, men arbeiðið hevur annars gingið skjótt og væl. Hetta er ein liður í áhaldandi arbeiðnum at tryggja eitt álítandi og tíðarhóskandi elnet, sigur Jón Nielsen, deildarstjóri fyri Netið hjá Sev.

Gamla støðin verður rivin

Næsta stigið er at flyta há- og lágspenningsútgerðina úr gomlu støðini og inn í ta nýggju. Síðani verður gamla støðin rivin, og ein battaríhøll verður bygd á staðnum.

Fleiri føroyskir veitarar eru við í verkætlanini, teirra millum J&K Petersen, Tangavirkið og Elfo.