Frá 1. juli 2026 tók Føroya Rættur eina nýggja talgilda skipan í brúk, til at senda rættarligar fráboðanir til borgarar.

Hetta merkir, at rætturin kann senda boð ígjøgnum MínBoks til persónar, sum skulu møta í rættinum, eru stevndir í eini sak, ella skulu fáa eina rættarliga avgerð.

Við nýggju skipanini verður talgild kunnuggerð galdandi. Tað merkir, at ein fráboðan frá rættinum verður mett sum móttikin og lógliga kunngjørd, tá borgarin hevur viðgjørt boðini.

Hetta kann til dømis vera, tá boðini verða latin upp, flutt ella strikað.

Nýggja skipanin merkir, at borgarar fáa fráboðanir frá rættinum beinleiðis í sín talgilda postkassa. Tá boðini eru viðgjørd, fáa tey rættarligt gildi.

Tað hevur týdning, tí vantandi reaktión kann fáa avleiðingar.

Um ein persónur ikki møtir til eitt rættarmál, sum hann ella hon er innkallað/ur til, kann tað í ávísum førum enda við, at viðkomandi verður dømdur sum útiblivin.

Um borgarin ikki letur við seg koma eftir, at boðini eru send í MínBoks, kann Føroya Rættur nýta aðrar hættir at fáa fráboðanina fram. Hetta kann til dømis vera við posti, telefon ella umvegis løgregluna.

Føroya Rættur vísir á, at nýggja skipanin ger samskiftið millum rættin og borgaran skjótari og meira smidligt. Samstundis er tað týdningarmikið, at borgarar regluliga kanna sín talgilda postkassa.

Tá ein fráboðan í MínBoks er latin upp ella á annan hátt viðgjørd, verður hon roknað sum móttikin og lógliga kunngjørd.

Hetta er eisini galdandi, um boðini verða strikað aftaná. Frá tí løtu hevur borgarin skyldu til at fylgja teimum boðum, sum eru send, og møta, um hann ella hon er kallað/ur til rættarmál.