Føroya Politi kann fáa eitt nýtt og víðfevnt amboð í kanningum av drápi, neyðtøku, yvirgangi og øðrum sera álvarsligum brotsverkum.

Eitt lógaruppskot frá danska løgmálaráðnum letur upp fyri, at DNA-slóðir av einum brotsstaði kunnu samanberast við upplýsingar í DNA-grunnum, sum verða nýttir til ættargransking.

Løgreglan kann sostatt finna fram til ein illgrunaðan gjøgnum arvaligt samband við fólk, sum hava latið DNA inn fyri at finna skyldfólk ella kortleggja sína ætt.

Sambært lógaruppskotinum metir Føroya Politi, at hátturin eisini kann vera viðkomandi í Føroyum.

Bert í teimum álvarsligastu málunum

Løgreglan fær ikki fría atgongd til at nýta háttin.

Tríggjar treytir skulu vera loknar. Ávísar grundir skulu vera til at halda, at DNA-slóðin stavar frá brotsfólkinum. Málið skal snúgva seg um yvirgang, neyðtøku, dráp ella annað brotsverk av serliga álvarsligum slag. Harumframt skal samanberingin væntast at fáa avgerandi týdning fyri kanningararbeiðið.

Hátturin kann serliga fáa týdning í málum, har løgreglan hevur DNA av einum brotsstaði, men ikki finnur samsvar í egnu DNA-skránni.

Fjarskyld kunnu geva eina avgerandi slóð

DNA-grunnar til ættargransking verða vanliga nýttir av fólki, sum leita eftir ókendum skyldfólkum ella vilja kortleggja sína ætt.

Ein DNA-vangi kann tó vísa arvaligt samband við onnur fólk, hóast hesi ikki sjálv hava latið DNA inn. Løgreglan kann tí fáa eina slóð gjøgnum ein fjarskyldan persón hjá einum møguligum brotsfólki.

Fleiri lógarbroytingar eru á veg

Atgongdin til DNA-grunnar hjá ættargranskarum er partur av einari umfatandi dagføring av rættargangslógini fyri Føroyar.

Sambært uppskotinum skal freistin at broyta eina avgerð um at sleppa einum revsimáli leingjast úr tveimum upp í fýra mánaðir. Broytingin skal millum annað geva myndugleikunum betri stundir at viðgera kærur frá órættaðum í málum um kynslig brotsverk.

Markið fyri einfaldaðan borgarligan rættargang verður samstundis skotið upp at hækka úr 50.000 upp í 100.000 krónur. Í málum um bústaðarleigu verður markið tó framvegis 50.000 krónur.

Lógaruppskotið er dagfest 2. juli 2026. Hoyringsfreistin er 19. august 2026, og ætlanin er fyribils, at lógarbroytingarnar skulu koma í gildi 1. juli 2027.