Føroya Politi fekk samanlagt færri fráboðanir í 2025 enn árið fyri. Kortini vaks talið av fráboðanum um brot á revsilógina munandi.
Í 2025 vórðu 964 revsilógarbrot fráboðað. Í 2024 var talið 720. Tað eru 244 fleiri fráboðanir og ein vøkstur upp á nærum 34 prosent. Tølini eru úr frágreiðingini Føroya Politi – Hagtøl 2025.
Samlaða talið heldur fram at minka
Tá ið fráboðanir um brot á revsilógina, ferðslulógina og aðrar serlógir verða taldar saman, var samlaða talið 2.756 í 2025.
Árið fyri var talið 2.817. Tað eru 61 færri fráboðanir. Síðan 2022 er talið fallið úr 3.727 niður í 2.756. Tað svarar til eina minking upp á 26 prosent.
Endurtikin stuldur lyftir tølini
Stóri vøksturin í revsilógarbrotum stavar serliga frá ríkingarbrotsverkum. Talið vaks úr 271 í 2024 upp í 510 í 2025.
Fráboðanir um handilsstuld fóru úr 57 upp í 250. Sambært politinum stavar meginparturin av økingini frá nøkrum málum, har starvsfólk í handlum í eitt longri tíðarskeið hava stolið aftur og aftur frá arbeiðsplássinum.
Ov tíðliga at staðfesta eina varandi gongd
Politiið ávarar ímóti at leggja ov nógv í tølini fyri eitt einstakt ár. Føroysku tølini eru smá, og nøkur fá mál kunnu ávirka hagtølini nógv.
Vøksturin skal tí halda fram komandi árini, áðrenn staðfestast kann, at talan er um eina varandi gongd.
