Viðareiðistunnilin hevur nú fingið radioskipan, sum ger tað møguligt hjá tilbúgvingini at bróta inn á allar radiokanalir og senda beinleiðis boð til bilførarar inni í tunlinum. Skipanin varð tendrað 24. september, meðan ársins fyrsta stóra heystaródn leikaði á. 

Nýggja útgerðin kostaði umleið 1,4 milliónir krónur, og El-Service stóð fyri arbeiðinum. Sambært Landsverki gekk uppsetingin skjótt og væl. 

Tilbúgvingin fær beinleiðis samband

Ein tann týdningarmesta funkan í skipanini er sokallaða break-in-skipanin. Hon ger, at tilbúgvingin kann seta vanligu radiokanalirnar úr gildi og senda neyðug boð beinleiðis til fólk, sum koyra gjøgnum tunnilin.

Hetta kann fáa stóran týdning, um eldur, ferðsluóhapp ella onnur álvarsom støða tekur seg upp. Radioskipanin kann hava fleiri kanalir, og nú ber eisini til at hoyra tað sama inni í tunlinum sum uttanfyri. 

Kom fleiri ár eftir tunnilin

Radioskipanin var ikki partur av upprunaligu tunnilsverkætlanini, og tí er hon komin fleiri ár eftir, at tunnilin varð tikin í nýtslu.

Landsverk upplýsir, at fleiri føroyskir tunlar framvegis eru uttan radioskipan. Tørvurin verður mettur so hvørt. Men bæði tilbúgvingin og fólk á staðnum hava saknað radiosamband í Viðareiðistunlinum, og tí varð skipanin nú sett upp.