12.august letur ein nýggjur frítíðarskúli upp í Porkeri.

Í Frítíðarskúlanum koma børn úr 1. og 2. flokki í Porkeris skúla, umframt forskúlabólkurin í Dagrøktini.

Endamálið við Frítíðarskúlanum er at skapa eitt trygt og mennandi umhvørvi, har børnini eftir skúlatíð fáa møguleika at menna seg málsliga, sálarliga, sosialt, handaliga og rørsluliga.

Menningin fer fram undir umsorgan, vegleiðing og stuðli frá vaksnum.

Í Frítíðarskúlanum verður stórur dentur lagdur á at virða frítíðina hjá børnunum, har spæl, hugflog og felagsskapur hava góð kor.

Verkstaðarbeiði, skapandi virksemi og upplivingar úti í náttúruni verða tí raðfest, soleiðis at børnini fáa fjølbroyttar upplivingar og møguleika at menna seg á ymiskum økjum.