Eitt nýtt uppskot frá ES-nevndini kann fáa avleiðingar fyri føroysku grindaveiðuna. Tað stendur í einari nýggjari viðmerking frá danska uttanríkismálaráðnum.
ES-nevndin vil áseta eina felags støðu fyri ES til teir tríggjar næstu fundirnar í Altjóða hvalaveiðinevndini, IWC. Endamálið er millum annað at varðveita bannið móti vinnuligari hvalaveiðu og at fáa hvalaveiðuna hjá øllum limalondum undir eftirlit hjá IWC.
Danmark vísir á mótstríðandi áhugamál
Danska stjórnin tekur sambært viðmerkingini undir við, at hvalastovnar skulu verjast móti veiðu, sum ikki fer fram á ábyrgdarfullan hátt. Samstundis heldur stjórnin fast við meginregluna um, at tilfeingið í havinum skal kunna gagnnýtast á burðardyggan hátt og á vísindaligum grundarlagi.
Sambært donsku stjórnini kann uppskotið tí vera torført at sameina við tey samlaðu áhugamálini hjá ríkisfelagsskapinum, tí hvalaveiða fer fram bæði í Føroyum og Grønlandi.
Uppskotið hevur tí eisini verið sent til hoyringar hjá viðkomandi myndugleikum í Føroyum og Grønlandi. Hvalir eru longu friðaðir í ES-sjógvi, men uppskotið kann kortini fáa avleiðingar fyri føroyska og grønlendska smáhvalaveiðu.
