Í gjár seinnapartin varð nýggjasta skipið hjá Navigare Shipping, MV Hav Leiti, hátíðarhildið við dóp í Harlingen í Hollandi.

MV Hav Leiti er tað fyrsta av fýra nýggjum systurskipum, sum reiðaríið hevur latið byggja. Skipið er munandi størri enn verandi skip í flotanum og málar nærum 90 metrar í longd og 15,45 metrar í breidd. Bruttotonsatalið er 3.984 BT.

Talan er um eitt nútímans general cargo-skip, har serligur dentur er lagdur á umhvørvisvinarligar loysnir og at minka um útlátið. Skipið hevur diesel-elektriskt framdriftarskipan og verður rikið við fýra el-motorum. Harumframt er gravimaskinan á dekkinum el-rikin, sum bæði minkar um orkunýtslu og CO₂-útlát.

Við MV Hav Leiti tekur Navigare Shipping enn eitt stig móti einum meira nútímans og burðardyggum skipaflota.

Eftir ætlan verða hini trý systurskipini latin og tikin í nýtslu í 2026 og 2027.