Nýggja vælveruøkið AK-Sauna er latið upp við bátahylin í Kollafirði. Nógv fólk vóru við til upplatingina, har sauna og sambandið við sjógvin vóru í miðdeplinum.

Árni og Kitty Laksáfoss standa fyri nýggja tilboðnum, sum er partur av vaksandi áhuganum fyri sauna og saunagosi.

Skal styrkja lokalsamfelagið

Elsa Berg, borgarstjóri, og Anja Weyhe, býráðslimur, vóru við til upplatingina og ynsktu eigarunum tillukku við verkætlanini.

– Tað er gleðiligt at síggja, tá fólk taka stig til nýtt virksemi. Slíkar verkætlanir gera lokalsamfeløgini sterkari og fjølbroyttari, segði Elsa Berg.

Meira enn ein sauna

Borgarstjórin vónar, at økið verður eitt savningarstað, har fólk kunnu hittast og práta saman.

Hon legði eisini dent á serligu staðsetingina við sjógvin og gongugøtuna undir brúnni, sum eftir hennara tykki gera upplivingina enn serligari.