Í fjør brúktu vit 305.099,7 tons av olju í Føroyum. Tað vísir ein uppgerð hjá Hagstovuni, sum hevur talt nýtsluna saman.

Tað merkir, at oljunýtslan er á veg uppeftir aftur av eftir at hon minkaði nokk so fitt frá 2021 til 2022, kanska sum ein avleiðing av koronu.

Men tað merkir, at í fjør brúktu vit stívliga 4.000 tons meiri olju í fjør enn í 2023.

Annars var oljunýtslan í hæddini í 2021 táið vit brúktu sløk 312.800 tons av olju. Men so minkaði nýtslan nógv og í 2022, var hon stívliga 293.700 tons. Men síðani tá er nýtslan hækkað aftur, upp í 305.099,9 tons.

Føroysk skip, ið bunkra uttanlands, eru við í hesi uppgerð. Hinvegin eru útlendsk skip, ið bunkra í Føroyum, drigin frá.

Tað er serliga vinnan, sum drívur oljunýtsluna uppeftir. Tað er eisini vinnan, sum brúkar nógv tað mesa av oljuni. Í fjør brúkti vinnan 200.291 tons av olju og tað er nógv tað mesta nakrantíð. Sum tað sæst á talvuni niðanfyri, minkaði oljunýtslan hjá vinnuni eitt sindur í 2022, men síðani hevur vøksturin verið stórur.

Hinvegin er oljunýtslan bæði hjá Sev, hjá bilum, og hjá húsarhaldum, minkað.

Serliga hjá Sev er minkingin stór tí í 2021 brúkti Sev 54.155 tons av olju og í fjør brúkti Sev 43.682. tons, ella 10.473 tons færri.

Eisini hjá privatu húsarhaldunum er nýtslan minkað nokk so fitt, tí tey brúktu 37.691 tons av olju í 2021, men tað var minkað niður í  28.572 tons í fjør, tað er ein minking upp á 9.119 tons.

Hinvegin er ikki tann stóra minkingin hjá bilum, tí í 2021 brúktu bilar 36.100 tons av bensini og diesel og tað minkaði niður í 35.224 tons í fjør.