Ungarn stendur framman fyri einari møguligari orkukreppu, tí metlága vatnstøðan í Donau hóttir raksturin á kjarnorkuverkinum í Paks. Verkið framleiðir nærum helmingin av allari elorkuni í landinum.

Tað skrivar CNN.

Péter Magyar, forsætisráðharri, ávaraði mánadagin um, at teir torførastu fimm dagarnir enn eru fyri framman.

– Vit eru á ókendum leiðum. So leingi sum vatnstøðan heldur fram at lækka, er framvegis vandi fyri, at verkið má steðga, segði hann.

Seinni upplýsti hann, at nýggjastu forsagnirnar um vatnstøðuna í Donau vóru eitt sindur bjartari enn tær undanfarnu.

Donau kølir reaktorarnar

Vatn úr Donau verður nýtt til at køla reaktorkjarnarnar og aðrar avgerandi skipanir á verkinum. Verður elframleiðslan steðgað, hevur verkið kortini framvegis tørv á stórum vatnnøgdum fyri at forða fyri einari kjarnorkuvanlukku.

Paks-kjarnorkuverkið hevur verið í rakstri í 44 ár og hevur ongantíð áður verið noytt at steðga, tí ov lítið vatn hevur verið í Donau.

Magyar sigur, at elveitingin higartil hevur verið støðug, tí bæði húsarhald og vinnulív hava minkað um elnýtsluna. Men næstu dagarnir verða avgerandi.

Í Rumenia er støðan eisini álvarslig. Har vórðu tveir kjarnorkureaktorar steðgaðir í juli, tí ov lítið vatn var í Donau.