Ongi úrslit

Ósemjan um makrelin heldur fram: Føroyar og grannalondini enn ikki samd

Nýggjasti fundurin um makrelin gav lítið úrslit. Stovnurin er undir stórum trýsti, og næsti avgerandi fundurin verður 20. oktober.

© Daniel Steadman.
Strandarlondini, sum umsita makrelin í landnyrðingspartinum av Atlantshavi, gjørdu bert avmarkað framstig á seinasta fundinum 18. september.
Edmund Jacobsen
19. sepember kl. 17:00

Strandarlondini, sum umsita makrelin í landnyrðingspartinum av Atlantshavi, gjørdu bert avmarkað framstig á seinasta fundinum 18. september. 

Føroyar vóru við á fundinum saman við ES, Grønlandi, Íslandi, Noregi og Bretlandi.

Sambært Daniel Steadman hjá The Pew Charitable Trusts varð tó tosað um eina langtíðarætlan fyri umsitingina av makrelstovninum. Eygleiðarar sluppu eisini hesa ferð at bera fram síni sjónarmið. Á fundinum í apríl fingu teir ikki høvi til tað.

Makrelstovnurin undir vandamarki

Støðan hjá makrelstovninum er álvarslig. Pew vísir til eina meting hjá ICES frá 2025, sum staðfesti, at stovnurin var farin niður um eitt kritiskt lívfrøðiligt mark. 

Verður stovnurin liggjandi undir hesum markinum, kann tað ávirka evnini hjá honum at endurnýggja seg.

Í 2025 eydnaðist heldur ikki strandarlondunum at semjast um eina samlaða mest loyvda heildarveiðu, TAC. Tey komu heldur ikki ásamt um, hvussu veiðan skuldi býtast, ella um eina felags langtíðarætlan fyri umsitingina av stovninum.

Pew finst at styttari tilgongd

Sambært Pew hava nøkur, men ikki øll, strandarlondini sett eina avmarkaða MSE-tilgongd í verk. Endamálið er at kanna møguleikar fyri framhaldandi veiðu, um vísindaliga ráðgevingin fyri 2027 verður, at eingin makrelur skal veiðast.

Pew finst at tilgongdini, tí uttanhýsis áhugabólkar ikki vóru tiknir við, og mælir í staðin til eina fullfíggjaða MSE-tilgongd við øllum strandarlondunum og við atliti at vistskipanini.

Næsti stóri fundurin um umsitingina av makrelinum verður 20. oktober. Tá skulu strandarlondini aftur royna at finna felags grundarlag undir framtíðar umsitingini av stovninum.

Mest lisið hesa vikuna

Her eru tey sløgini av heilsuskaðiligum mjøli sum er selt í Føroyum

20. november kl. 12:43

Ein viti er slóknaður: Minningarorð um Óla Eyðun Eliassen

16. november kl. 07:00

Tað er eitt felag Gunnar ikki ætlar sær at umboða

15. november kl. 23:55

Arbeiðshóhapp: Datt tríggjar metrar niður av einum byggipalli

17. november kl. 07:38

SÍ MYNDIR: Ógvusligur eldur herjaði hjá MEST á Skála

18. november kl. 21:28

Løgmaður er ónøgdur: Hann vil tryggja sær at hetta ikki hendur aftur

17. november kl. 09:28