Norðurlandahúsið verður 17. juni karmur um eina ráðstevnu, har úrslitini av eini nýggjari norðurlendskari kanning um lívskorini hjá LGBTI-persónum í bygdasamfeløgum verða løgd fram við serligum denti á Føroyar.
Sambært fyrireikarunum eru lívskorini hjá LGBTI-persónum tætt knýtt at tí staði, tey búgva á. Munur er á møguleikum fyri stuðli, netverkum og málrættaðum átøkum kring Norðurlond. Serliga í smáum og fábýltum samfeløgum kunnu landafrøðilig, mentanarlig og sosial viðurskifti skapa serligar avbjóðingar.
Avmarkaður kunnleiki um føroysk viðurskifti
Á ráðstevnuni verða bæði norðurlendsk og føroysk sjónarmið løgd fram. Kajsa Widegren, dosentur í kynsvísindum í Svøríki, og Elisabeth Skarðhamar Olsen frá Fróðskaparsetri Føroya fara at umrøða niðurstøðurnar í kanningini og týdningin, tær kunnu hava fyri føroyska samfelagið.
Margit Stórá, landsstýriskvinna í almanna- og bústaðamálum og javnstøðumálum, setur ráðstevnuna. Eisini verður pallborðskjak um, hvussu norðurlendskt samstarv kann styrkja rættindi og møguleikar hjá LGBTI-persónum í Føroyum.
Serligur stuðul til føroyskar verkætlanir
Eftir ráðstevnuna verður eitt kunnandi tiltak um norðurlendska LGBTI-grunnin. Í ár verða umsóknir úr Føroyum, Grønlandi og Álandi serliga raðfestar. Stuðul kann søkjast frá 50.000 upp í 500.000 krónur, og freistin er 2. novembur 2026.
Sambært grunninum skulu í minsta lagi tríggir samstarvspartar úr trimum ymiskum norðurlondum standa aftan fyri eina umsókn. Endamálið er millum annað at styrkja kunnleikan um avbjóðingar hjá LGBTI-persónum og at menna norðurlendskt samstarv á økinum.
