Anguteeraq kom mikukvøldið aftur á Skálafjørðin, har báturin varð bygdur hjá AWI Boats í 2024.

Fyrr í ár rendi hann á eitt ísfjall í Grønlandi og fekk stóran skaða oman fyri vatngangin. Tí er báturin nú komin aftur til Runavíkar til umvælingar.

Sambært AWI Boats er báturin so sterkt bygdur, at hann kundi sigla víðari eftir samanstoytin.

Tveir mánaðir í Runavík

Anguteeraq er ein AWI 39-glasfiburbátur, sum varð bygdur til Grønlands. Har hevur hann fiskað tosk og svartkalva.

Umvælingin verður væntandi liðug um tveir mánaðir. Síðani fer Anguteeraq aftur til Ilulissat.

Báturin er útgjørdur við Volvo Penta-motori, síðuskrúvu, fiskireiðskapi frá Oilwind og radioútgerð frá Radiobúðini.