Í kjallaranum í húsum sínum Uppi við Garð í Leirvík hevur Rodmar Næs innrættað sær eitt lítið dreyiverkstað. Har brúkar hann nógvar tímar við dreyibonkin.
Úr føroyskum viði ger hann skálir, fuglar, ljósastakar, lampur og aðrar prýðislutir. Hvør lutur hevur sín egna dám, og arbeiðið krevur bæði tíð, hegni og tolsemi.
Allir lutirnir eru gjørdir úr føroyskum viði, og tað gevur handverkinum ein serligan føroyskan dám.
Deilir áhugan við aðrar
Rodmar arbeiðir ikki bara einsamallur. Hann hittist javnan við øðrum monnum á Oyrarbakka, sum eisini hava áhuga fyri at dreya. Har skifta teir orð og deila hugskot.
Eysturkommuna hevði boðað frá, at Rodmar skuldi sýna fram og selja handgjørdar lutir á jólamarknaðinum í Brandstøðini í Leirvík sunnudagin 15. november.
Til ber eisini at bíleggja lutir beinleiðis frá honum eftir egnum ynski.
