Røktarheimið Mørkin í Streymnesi hevur nú virkað í 20 ár. Í sambandi við merkisdagin verður skipað fyri almennum føðingardagshaldi leygardagin 23. mai klokkan 15, har øll eru vælkomin at vera við.

Í tvey áratíggju hevur røktarheimið verið ein fastur partur av gerandisdegnum hjá búfólkum, avvarðandi og starvsfólkum og hevur havt ein týdningarmiklan leiklut í eldrarøktini í økinum.

Ein dagur at líta aftur á og siga takk

Sambært fyriskiparunum er føðingardagshaldið eitt høvi at líta aftur á árini, sum farin eru, og at takka teimum mongu, sum hava verið partur av Mørkini – bæði búfólkum, avvarðandi, starvsfólkum og øðrum, sum hava havt tilknýti til heimið.

Á skránni verða røður, tónleikur og heiðran av starvsfólkum.

Starvsfólk heiðrað fyri trúgva tænastu

Millum hæddarpunktini verður serlig heiðran av fýra starvsfólkum, sum hava starvast á Mørkini síðani húsið lat upp fyri 20 árum síðani. Eisini verða gávur handaðar, og starvsfólk fáa høvi at bera fram røðu. Borgarstjórin í Sunda kommunu, Eyðstein Zachariasen, og stjórin í VEKS, Páll á Reynatúgvu, fara eisini at halda røðu. Signar í Homrum fer at framføra eitt lag, og dagurin endar við drekkamunni.