Trotið á brennievni í Russlandi gerst alsamt álvarsamari. Tað sigur bretski verju- og trygdarserfrøðingurin Michael Clarke við sjónvarpsrásina Sky News.

Sambært honum eru øll tíggju størstu oljureinsiverkini í Russlandi rakt minst eina ferð. Summi teirra eru álopin fleiri ferðir.

Hesa vikuna raktu ukrainsk álop oljureinsiverkið í Omsk, sum er tað størsta í Russlandi. Verkið liggur umleið 2.400 kilometrar frá ukrainska markinum.

Eitt oljureinsiverk, sum veitir Moskva brennievni, er eisini rakt.

Eingin trygd fyri vápnahvíld

Í Ukraina og Vesturheiminum vóna summi, at trotið á brennievni kann trýsta Vladimir Putin til samráðingar um vápnahvíld. Clarke ávarar tó ímóti at taka tað fyri givið.

Hann metir, at Putin eins væl kann herða kríggið og royna at elva til eina nýggja kreppu aðrastaðni fyri at flyta uppmerksemið.

Sambært Clarke eru tekin um, at Russland fyrireikar atgerðir ella uppílegging í norðvestur-Evropa. Hann nevnir Pólland og baltisku londini sum møgulig mál.

Endamálið kann sambært Michael Clarke vera at trýsta NATO-londini til at minka um ella steðga stuðlinum til Ukraina.

Tíggju lond fyrireika fólkaflytingar

Clarke vísir á, at tíggju lond arbeiða við ætlanum um skundisliga at flyta fólk burtur úr landamarksøkjum og bygdum økjum, um støðan versnar.

Londini eru Noreg, Svøríki, Finnland, Estland, Lettland, Litava, Pólland, Týskland, Danmark og Ísland.

Michael Clarke er bretskur professari og serfrøðingur í verju- og trygdarmálum. Hann er verju- og trygdargreinari hjá Sky News.