Brúkstreytirnar hjá Samleikanum eru dagførdar. Endamálið er at styrkja trygdina, tá brúkarar rita inn við Samleikanum.

Fyrstu ferð brúkarar nýta Samleikan eftir dagføringina, skulu teir góðtaka nýggju brúkstreytirnar.

Appin skal ávara um illgruna

Við broytingunum verða fleiri trygdarstig løgd afturat innritanini. Tey skulu hjálpa til at avdúka støður, har óviðkomandi royna at fáa atgongd við Samleikanum hjá einum brúkara.

Er illgruni um ólógliga atgongd, verða boð víst í Samleika-appini. Har fær brúkarin eina frágreiðing og kann avvísa innritanina.

100.000 innritanir um vikuna

Samleikin er talgilda atgongdin til fleiri almennar og privatar tænastur í Føroyum.

Tænastan hevur 52.000 brúkarar. Umleið 100.000 innritanir eru í Samleikanum um vikuna.

Talgildu Føroyar upplýsa, at broytingarnar skulu gera nýtsluna av Samleikanum tryggari.