Vindmyllutoymið hjá Sev er í ferð við at gjøgnumganga, feilfinna og umvæla vindmyllurnar í Húsahaga. Í hesum arbeiðinum fær Sev hjálp frá tøkningum hjá Full Circle Wind Services, sum hevur serkunnleika í viðlíkahaldi og umvæling av vindmyllum.

Í juli vóru fleiri lið av tøkningum hjá Full Circle í Føroyum undir leiðslu av Lauru Collin. Tey arbeiddu saman við starvsfólkum hjá Sev og høvdu eisini eyka fólk við, sum skuldu lærast upp.

Húsahagi væl egnaður til upplæring

Laura Collin sigur, at Húsahagi er væl egnaður til upplæring, tí stutt er millum vindmyllurnar. Aðrastaðni fer nógv tíð til ferðing og koyring, meðan tøkningarnir í Húsahaga kunnu ganga millum myllurnar.

Full Circle hevur høvuðssæti í Hollandi og hevur viðlíkahaldið av fleiri enn 700 vindmyllum í Evropa, Norðuramerika og Suðurasia um hendi.