Lýsingarátakið The Faroe Islands Space Program um sjóvarfalsorkuverkætlanina í Vestmanna hevur vunnið altjóða virðisløn á Cannes Lions International Festival of Creativity.

Átakið vann mánakvøldið kreativu B2B-løvuna. Tað var frammanundan tilnevnt í tveimum bólkum og hevur framvegis møguleika at vinna í einum øðrum bólki.

Føroysk orka á altjóða palli

Átakið snýr seg um verkætlanina við sjóvarfalsorku í Vestmanna. Svenska SKF, Minesto og Sev hava samstarvað um verkætlanina, og lýsingarfyritøkan NORD í Stockholm hevur staðið fyri átakinum.

Cannes Lions verður lýstur sum ein av størstu altjóða pallunum fyri kreativitet í marknaðarføring og samskifti.

Festivalur í Suðurfraklandi

Festivalurin verður hildin í Suðurfraklandi frá 22. til 26. juni. Har verður kappast um lýsingarátøk, filmar og annað kreativt tilfar í fleiri fakbólkum.

Virðislønin merkir, at ein føroysk orkuverkætlan nú er lyft upp á ein av heimsins kendastu kreativpallum.