Longu áðrenn HM 2026 er byrjað, hevur kappingin fingið harða atfinning fyri, hvussu vertstjóðin USA fer við luttakararnum.

Mánadagin varð somaliski FIFA-dómarin, Omar Abdulkadir Artan, noktaður innferð til USA, hóast hann var úttikin at døma dystir í endaspælinum. Harvið missir Somalia sín fyrsta HM-dómara nakrantíð.

Dagin eftir varð landsliðið hjá Senegal og fylgi teirra, møtt av umfatandi trygdareftirliti, tá tey komu til San Antonio. Upptøkur vísa at spælarar og leiðarar vóru bidnir um at taka skógvarnar av og fáa viðførið teirra kannað beint á lendingarbreytini.

Hesar báðar hendingarnar hava elvt til atfinningar og sett fokus á innferðarskipanina og trygdartiltøkini hjá USA.

Sum var tað ikki nokk, so er tað iranska liðið ikki vælkomið at yvirnátta í USA. Teirra ferðalag er tí flutt til Meksiko, hettar orsakað av krígnum. Teir ferðast tí í millum Tijuana í Meksiko, og USA, tá teir skulu spæla dystir.

Kritikarar óttast at slík mál kunnu koma at skugga fyri heimsmeistaraskapinum, áðrenn fyrsti dystur yvirhøvur er spældur.