Landsstýrismaðurin í skúlamálum, Bárður á Lakjuni, hevur sett Daniu Niclasen í farloyvisstarv sum skúlastjóri í Sørvágs skúla frá 1. august 2026.

40 ára gamla Dania Niclasen er úr Miðvági og hevur seinastu trý árini røkt skúlastjórastarvið í Sørvágs skúla. Við setanini fær skúlin tí ein leiðara, sum longu hevur drúgvan kunnleika til bæði skúlan og dagliga virksemið.

Drúgvar royndir í skúlaverkinum

Dania Niclasen hevur læraraútbúgving frá UCN Hjørring frá 2015. Harumframt hevur hon professiónsbachelor í donskum, linjugrein í søgu, B.Ed.-ískoytisútbúgving frá Fróðskaparsetri Føroya og hevur lokið masterútbúgving í leiðslu í 2026.

Royndur leiðari tekur við

Sambært Undirvísingarstýrinum hevur hon drúgvar undirvísingar- og námsfrøðiligar royndir úr fólkaskúlanum, bæði sum einalærari, lærari og innan serøkið. 

Harumframt hevur hon viðkomandi royndir við fyrisiting og leiðslu gjøgnum arbeiðið sum virkandi skúlastjóri.