Eyðkendi ljósaguli handilin niðri við sjóvarmálan hevði virksemi fram til fyrst í 1990’unum. Síðani Vestmanna kommuna keypti bygningin í 1996, hevur hann mest verið brúktur til tiltøk. Nú skal staðið aftur fáa lív.

Ætlanin er at fylla handilin við gomlum vørum, innpakkingum og lutum, sum vísa, hvussu gerandislívið og handilsskapurin í Føroyum einaferð sóu út. Millum annað verða kaffi, sukur, karamellur, reklamuskelti og siðbundnar húsarhaldsvørur partur av upplivingini.

Gomlu innrættingarnar standa enn

Eitt serligt við verkætlanini er, at nógv av upprunaligu innrættingini framvegis er varðveitt. Handilshillarnar, skuffurnar og skápini standa frammi, júst sum tá handilin stongdi.

Sambært kommununi gevur hetta heilt serligar møguleikar at endurskapa upprunaliga umhvørvið.

Framsýningarhandil og upplivingarmiðdepil

Endamálið er bæði at varðveita søguliga andan og geva vestmenningum og vitjandi eina livandi mynd av gerandisdegnum fyri meira enn hálvari øld síðani.

Framsýningarsniðgevin Johan Holm Simonsen hjálpir við arbeiðinum, sum longu er farið í gongd. Ætlanin er at vísa úrslitið fram um hálvan juni og hava opið fyri ferðafólkum í summarhálvuni. Seinni skal handilin eisini tillagast árstíðunum, soleiðis at gestir til dømis kunnu uppliva siðbundnan handilshátt á jólum.