Svenski veðurlagsráðharrin, Romina Pourmokhtari, skrivaði søgu í hesi vikuni, tá hon hevði tríggjar mánaðir gamla son sín, Adam, við á fund hjá umhvørvisráðharrunum í ES.
Sambært embætisfólki er hetta fyrstu ferð, at eitt pinkubarn hevur verið við á einum ráðharrafundi hjá ES-ráðnum.
Óvanliga sjónin vakti ans kring Evropa, har barnið fylgdi mammu síni á fundinum, meðan ráðharrarnir umrøddu veðurlags- og umhvørvispolitikk. Sambært embætisfólkum var Adam róligur allan fundin.
Pourmokhtari segði, at hon hevði valt at hava sonin við fyri at vísa, at tað ber til at sameina foreldraleiklutin við einum krevjandi almennum starvi.
Hon legði dent á, at foreldur, serliga mammur, ikki eiga at noyðast at velja millum familjulív og yrkisleið.
Ráðharrin vísti eisini á svensku skipanina við foreldrafarloyvi. Sambært henni er maki hennara í løtuni í foreldrafarloyvi, og tað ger tað lættari hjá teimum at býta ábyrgdina av barnarøktini.
Í Svøríki hava foreldur rætt til samanlagt 480 dagar við løntum foreldrafarloyvi fyri hvørt barn, ein av mest væl útbygdu skipanunum í heiminum.
At eitt pinkubarn var við á einum so týðandi ES-fundi, hevur elvt til kjak um arbeiðsumstøður hjá foreldrum.
Eisini verður tosað um manglandi javnstøðu og tørvin á, at arbeiðspláss og almennir stovnar verða lagaðir til veruleikan hjá familjum við smáum børnum.
