Hesi seinastu 10 árini hava kvinnur í einum ávísum aldri fingið tilboð um at verða kannaðar regluliga fyri brótkrabba. Tað eru kvinnur ímillum 50 og 69 ár, sum fáa tilboð um hesar annaðhvørt ár.
Tað er ein kanning, har bróstini verða kannað við røntgen, eisini kallað mammografi. Og tey nýggjastu tølini frá Heilsustýrinum vísa, at undirtøkan er góð.
Tey siga, at øll árini hevur eru tað yvir 81 prosent av kvinnunum, sum tóku av, men í fjør var talið uppi á 89 prosentum. Sostatt eru tað bara 10. hvør kvinna, sum ikki tekur av.
Í fjør fingu 2.142 kvinnur tilboð um kanning, og 1.907 av teimum tóku av tilboðnum, ella 89 prosent Í 2024 var undirtøkan 90,7 prosent, og tað er tað mesta higartil.
Myndin vísir, hvussu stórur partur av teimum, ið fingu tilboð um skreening fyri bróstkrabba í tíðarskeiðnum 2017-2025, tóku av
Nú í oktobur verður ljós varpað ljós á bróstkrabba um allan heimin. Tað er eitt átak sum verður kallað Ljósareyður oktobur.
Bróstkrabbi er vanligasta slagið av krabbameini hjá kvinnum í vesturheiminum, og vandin økist munandi eftir at kvinnurnar hava fylt 50.
Við kanningini ber til at finna tekin um bróstkrabba tíðliga - ofta áðrenn kvinnan sjálv merkir nakað til sjúkuna. Tá ið bróstkrabbi verður staðfestur tíðliga, eru betri møguleikar fyri væleydnaðari viðgerð.
Tí hevur tað týdning at taka støðu til tilboðið um kanning, eisini hóast kvinnan eingi sjúkutekin hevur, sigur Heilsustýrið.
– Varnast ein kvinna broytingar í bróstunum, eigur hon at venda tær til lækna, eisini hóast hon nýliga hevur verið til mammografi, leggja tey afturat.
Í næstum skal landsstýriskvinnan í heilsumálum, Eyðdis Hartmann Niclasen, greiða frá um nøkur ætlan er um at geva kvinnum í fleiri aldursbólkum tilboð um regluligar kanningar fyri bróstkrabba, soleiðis sum tey hava gjørt í øðrum londum
Les meiri um tað her: Vísindaligar kanningar benda á at tað kann bjarga nógvum kvinnum
