Hevði tað ikki betri at lækka mvg á øllum vørum yvir ein kamb, heldur enn at geva ávísum vørum undantak og hava fult mvg á øllum hinum vørunum?

Tann spurningin reisir Steffan Klein Poulsen, løgtingsmaður fyri Miðflokkin. Tí hevur hann spurt Aksel V. Johannesen, hvussu nógvar inntøkur, landskassin hevur av teimum undantøkum, sum eru í mvg-lógini.

Hann vil eisini hava at vita, hvat tað kostar at umsita øll hesi undantøkini, bæði hjá landsumsitingini og hjá vinnuvirkjunum.

Steffan Klein Poulsen spyr eisini landsstýrismannin hvat hann heldur um at strika øll undantøkini, men so heldur lækka mvg á øllum vørum eitt sindur.

Steffan Klein Poulsen staðfestir, at undantøkini í mvg lógini verða alsamt fleiri í tali, og at lóggávan verður fløktari fyri hvørt undantak, sum verður givið - og tað krevur alsamt meiri umsiting.

Men verða undantøkini strikað, og mvg verður lækkað eitt sindur yvir ein kamb, hevði tað givið øllum føroyingum ein lætta, saman hvat teir keypa, umframt at tað almenna, og privata vinnan, spara í umsiting.