Maðurin hevði søkt um frítøku frá at rinda gjald í arbeiðsmarknaðareftirlønargrunnin (AMEG) í Føroyum fyri alt árið. Um tað ikki bar til, vildi hann í minsta lagi sleppa undan gjaldinum fyri januar, februar og mars, tá hann arbeiddi í Noregi.

Hann búði tó í Føroyum alt árið, og eftir teir fyrstu tríggjar mánaðirnar fekk hann arbeiði í Føroyum.

Árið kann ikki býtast sundur

Sambært lógini um AMEG verður gjaldið roknað av samlaðu inntøkuni, sum er grundarlag undir skattaútrokningini.

Føroya Kærustovnur staðfestir, at eingin heimild er í lógini fyri at býta árið sundur soleiðis, at ein partur av árinum verður undantikinn AMEG-gjaldi.

Gjaldið til arbeiðsmarknaðareftirlønargrunnin er sambært avgerðini trý prosent.

Føroysk lóggáva var galdandi

Málið varð eisini viðgjørt eftir norðurlendska sáttmálanum um sosiala trygd og ES-reglum. Meginreglan er, at ein persónur bert kann vera fevndur av lóggávuni í einum landi í senn.

Kærarin hevði bæði búð og arbeitt størsta partin av 2024 í Føroyum, bæði roknað eftir mánaðum og inntøku. Tí var føroysk lóggáva galdandi, stendur í avgerðini hjá Føroya Kærustovni.