Sunnudagin var sannur hátíðardagur í Eiðis kirkju, tá ið Ida Lykke Kannuberg tók við sum virkandi sóknarprestur í Eiðis prestagjaldi.

Tað skrivar Fólkakirkjan

Sóknarpresturin, Jonhard Jógvansson, er farin í lestrarfarloyvi í tríggjar mánaðir, og sostatt er Ida Lykke Kannuberg sett í starv sum virkandi prestur hesa tíðina.

Tað var Ovi Brim próstur, sum skipaði hana í embætið.

Ida, sum er av Vestursælandi, varð prestvígd til tænastu í Danmark í 2021 og hevur síðani verið prestur í Diakonissestiftelsen á Frederiksberg, og aðrastaðni.

Fólkakirkjan sigur, at í hesum føri er talan um eina heilt serstaka hending, tí sunnudagin varð kirkjusøga skrivað á Eiði.

Hetta er nevniliga á fyrsta sinni, at bæði kona og maður eru prestar í fólkakirkjuni í Føroyum. Maður Idu, Tummas Kannuberg er eisini prestur og sunnudagin 16. august verður hann settur í embætið í Norðstreymoyar eystara prestagjaldi og tað fer fram í kirkjuni í Hvalvík.

Aftaná gudstænastuna borðreiddi kirkjuráðið á Eiði við góðum drekkamunni í snotiligu hølunum hjá EB.

Myndina tók Jens Jákup Hansen