Integratiónssamstarvið í Norðureysturøkinum skipar hósdagin 24. september fyri kunningarfundi fyri fólk, sum nýliga eru flutt til Føroya. Fundurin verður á Miðnámi á Kambsdali frá klokkan 18.20 til 19.20.

Skulu læra føroyska samfelagið betur at kenna

Endamálið er at geva nýkomnum eina góða innleiðslu í føroyska samfelagið. Luttakararnir fáa kunning um føroyska mentan, gerandisdag, rættindi og skyldur, umframt tær tænastur og møguleikar, sum eru tøkir í Føroyum.

Eisini verður høvi at hitta onnur nýkomin og knýta sambond í lokalsamfelagnum.

Nýtt búmerki skal gera samstarvið sjónligari

Integration NorthEast hevur samstundis fingið nýtt búmerki. Endamálið er at styrkja felags samleikan og gera integratiónssamstarvið í Norðureysturøkinum sjónligari.

Bókstavirnir „i“, „n“ og „e“ mynda navnið og skulu samstundis ímynda fólk, sum standa lið um lið. 

Búmerkið skal vísa felagsskap, samanhald og fjølbroytni.