Hetta vikuskiftið er ársins G-festivalur í Gøtu. Formliga byrjar festivalurin í dag, men í gjár var tað onkur, sum tjóvstartaðu.

Nakað eftir midnátt varð nevniliga ringt til løgregluna melda, at onkur spældi so harðan tónleik uttandura, at tað var ikki sovandi.

Men løgreglan sigur, at tá ið tey komu fram, var alt longu sløkt, og so var friður.

Eisini varð ein bilførari meldaður fyri at koyra við kenning, tí hann koyrdi so óstøðugt. Hann var á veg úr Gøtu. til Leirvíkar, men tá ið løgreglan steðgaði bilinum, vísti tað seg kortini, at hann var púra edrúur.