Tað er bæði illa umhugsað og óvanliga stuttskygt av landsstýrismanninum í samferðslumálum, tá hann ætlar at avtaka rættin hjá kommunum at áseta havna-, vøru- og brúgvagjøld fyri tænastur til Strandfaraskip Landsins.

Í Tórshavnar havn fara hesar inntøkur til at tryggja og betra tænastuna, og til íløgur í uppraðfestingar. Síðan aldarskiftið eru íløgur gjørdar fyri næstan 800 mió. kr.

• Nýggj høvuðsbryggja við rampu
• Eyka rampa við havnarskrivstovuna
• Ferðafólkatornið
• Dýping við Tinganes
• Atløgupláss til Nólsoyarskip
• Atløgupláss til Erlu Kongsdóttir
• Skansabryggjan, ið veitir atløgutrygd

Inntøkurnar rinda eisini fyri beinleiðis tænastuveitingar og viðlíkahald, ljós, asfalt og rakstur. Størsta tænastan av hesum er atløgutrygdin. Tað eru altíð tvey pláss tøk til Smyril, umframt at Bursatangi er tøkur til Nólsoyarleiðina.

Tað er heldur eingin loyna, at virksemið hjá Smyrli tekur nógv pláss á landi, har eitt stórt øki er sett av til bilar. 

Hetta eru alt tænastur, ið Tórshavnar kommuna tekur ábyrgd av, og sum eru til gagns fyri alt Føroya fólk. Vit lata enntá Strandfaraskipum Landsins ein avsláttur á 65%.

Landið væntar eina sparing á 7 mió. kr., um uppskotið vinnur frama. Av hesum missir Tórshavnar havn yvir 6 mió. kr., ið er yvir 7% av inntøkunum. Peningur, ið fer at mangla í, tá framtíðaríløgur og viðlíkahald skulu raðfestast. 

Landsstýrismaðurin tykist at hava gloymt orðatakið "Vilt tú valda, mást tú gjalda". Hetta hevur landið gjørt á Krambatanga, har ein landshavn er bygd, sum verður rikin av landinum. Í Havn er tað Tórshavnar havn sjálv, ið rindar fyri allar útbyggingar og allan rakstur. Tí er samanberingin millum Krambatanga og Tórshavnar havn heilt burturvið. 

Uppskotið hjá landsstýrismanninum er tað umvenda av at taka ábyrgd. Heldur enn at finna sparingar á sínum egna øki, ætlar hann við einum pennastroki at flyta almennar útreiðslur til kommunurnar, sum um vit vóru ein sjálvtøka.

Væntar landsstýrismaðurin veruliga, at hann kann fáa ókeypis tænastur frá Tórshavnar havn? 

Landsstýrismaðurin ger hetta uttan hoyringar og uttan atlit til at Innlendismálaráðið í 2009 staðfesti, at eitt líknandi uppskot var at meta sum ognartøka og at vera í stríð við § 73 í grundlógini.

Eg fari at heita á landsstýrimannin um at taka hetta illa umhugsaða uppskotið aftur alt fyri eitt.

Elsa Berg,
borgarstjóri í Tórshavnar kommunu