Fróðskaparsetur Føroya hevur fingið tvær milliónir krónur frá Novo Nordisk Grunninum til at menna grundarlagið undir einari nýggjari masterútbúgving í Advanced Practice Nursing, APN. Men pengarnir kunnu ikki brúkast til sjálvan raksturin av útbúgvingini.

Skal Setrið kunna bjóða útbúgvingina og taka ímóti lesandi, er neyðugt við fastari rakstrarjáttan á fíggjarlógini. Fíggjarlógaruppskotið skal leggjast fyri Løgtingið 1. oktober.

Skulu kunna átaka sær uppgávur hjá læknum

APN-útbúgvingin er ætlað sjúkrarøktarfrøðingum, sum skulu fáa framkomnar kliniskar førleikar og kunna arbeiða sjálvstøðugt við torgreiddum sjúklingum.

Arbeiðið kann millum annað fevna um kliniska støðutakan, heilivágsmeting, samskipan av sjúklingagongdum og ávísing til víðari kanningar og viðgerð.

Endamálið er millum annað, at APN-sjúkrarøktarfrøðingar kunnu átaka sær fleiri uppgávur, sum annars krevja lækna. Tað kann stytta bíðitíðir, lætta um arbeiðstrýstið hjá læknum og tryggja, at tíðin hjá fakfólki í heilsuverkinum verður gagnnýtt betur.

Stórur partur av grundarlagnum longu fíggjaður

Nýggju tvær milliónirnar skulu millum annað brúkast til at menna undirvísingarhættir, undirvísingartilfar í telemedisini og kliniska simulatión.

Granskingargrundarlag, námsskipan, undirvísingarhættir og simulatión eru longu fyri ein stóran part fíggjað við uttanhýsis pengum. Tað, sum nú vantar, er almenna fíggingin til raksturin av sjálvari útbúgvingini.