Kraftiga hitabylgjan, sum rakti stóran part av Evropa síðst í juni, hevði við sær eina týðiliga øking í deyðatalinum.

Eftirlitsskipanin EuroMOMO boðar í dag frá, at tað vórðu umleið 10.650 fleiri deyðsføll skrásett enn væntað í teimum 27 ES-londunum í vikuni 22.–28. juni.

Meira enn 9.000 av teimum eyka deyðsføllunum vóru millum fólk, sum vóru 65 ár ella eldri.

EuroMOMO hevur eftirlit við deyðatalinum í Evropa og verður rikin av Statens Serum Institut (SSI) við stuðli frá Evropeiska Miðstøðini fyri Sjúkufyribyrging og -Eftirlit (ECDC) og Heimsheilsustovninum (WHO).

Lasse Skafte Vestergaard, yvirlækni á SSI, sigur, at gongdin er óvanlig. Sambært eftirlitsdátunum hevði deyðatalið ligið undir tí væntaða í átta vikur frammanundan, áðrenn tað hækkaði brádliga undir hitabylgjuni.

Yvirdeyðiligheit merkir, at fleiri fólk doyggja, enn hagtøl vanliga vísa fyri eitt ávíst tíðarskeið. Tølini staðfesta sostatt eina týðiliga øking í deyðatalinum, men prógva ikki í sjálvum sær, at øll tey eyka deyðsføllini beinleiðis vóru orsakað av hitanum.

Heilsuserfrøðingar meta kortini, at hitabylgjan var høvuðsorsøkin, tí eingin størri farsótt ella onnur greið frágreiðing er funnin fyri hesa stóru økingina.