Hallur Oskar Olsen og Rúni Johannesen, sum undirvísa á Glasi, hava givið út nýggja lærubók í virkisbúskapi til frisørlærlingar. Bókin snýr seg um sonevndan salongbúskap og er givin út á teirra egna forlagi, Vetur.

Lagað beinleiðis til frisøryrkið

Endamálið hevur verið at laga tilfarið serliga til frisørlærlingar, so undirvísingin verður meira praktisk og viðkomandi. Óneyðugt tilfar er tikið burtur, og málið er gjørt lættari og nærri vanligum talumáli.

Høvundarnir hava eisini havt samrøður við frisørar. Tær hava givið teimum betri innlit í, hvør roknskaparligi tørvurin í yrkinum er, og hvussu tilfarið best kann lagast til frisørlærlingar.

Hallur royndi tilfarið við einum frisørflokki seinasta skúlaár. Í ár hevur verandi flokkur tikið bókina í nýtslu.