Universitetið í Oslo søkir eftir jarðfrøðingi til føroysku DecarbFaroe-verkætlanina. Endamálið er at leggja grundarlag undir eina royndarskipan, har CO₂ verður dælt niður í føroyskt basalt og bundið í mineralum.
Talan er um eitt fulltíðarstarv á Njord Centre við Universitetið í Oslo fram til 31. desember 2028. Starvið skal setast skjótast gjørligt og í seinasta lagi í januar 2027. Umsóknarfreistin er 19. oktober 2026.
Skal arbeiða tætt saman við Jarðfeingi
Granskarin skal arbeiða við jarðfrøði, bergfrøði og vatnjarðfrøði í tøttum samstarvi við Jarðfeingi.
Arbeiðið fevnir millum annað um at kanna føroyskt basalt og, hvussu mineral verða myndað í grótinum. Framkomnir kanningarhættir sum elektronmikroskopi og røntgentomografi skulu brúkast. Granskarin skal eisini greina upplýsingar úr boriholum og grótsýni umframt úr pumpuroyndum.
DecarbFaroe skal geva størri vitan um, hvussu CO₂ kann bindast sum mineral í gomlum basalti í Norðuratlantshavi, sum í dag liggur oman fyri havflatan í Føroyum. Verkætlanin hevur 19 samstarvspartar úr granskingarheiminum, almennum granskingarstovnum og vinnuni.
Kunnleiki til føroyska jarðfrøði er ein fyrimunur
Umsøkjarar skulu hava doktaraútbúgving í jarðfrøði og millum annað hava førleikar innan strukturella jarðfrøði og bergfrøði. Kunnleiki til føroyska jarðfrøði er eisini nevndur sum ein ynskiligur førleiki.
