Norðhavssildin í Norskahavinum er í ár mett til 4,2 milliónir tons. Tað er 16 prosent meira enn í kanningini í 2025.

Talið av sildum er mett til 22,2 milliardir. Tað er 8 prosent hægri enn í fjør. Kanningarbólkurin metir, at kanningin í 2026 varð nóg væl framd. Tí verður mælt til, at tølini verða brúkt í stovnsmetingini.

Ungu árgangirnir fylla nógv

Fýra ára gomul sild, árgangurin frá 2022, er størsti árgangurin í tali. Hann stendur fyri 33 prosentum av sildini í kanningini.

Í vekt er tað tó fimm ára gamla sildin, árgangurin frá 2021, sum fyllir mest. Hon stendur fyri 26 prosentum av lívsmassanum.

Svartkjafturin tekur dik á seg

Eisini svartkjafturin vísir greiðan vøkstur. Lívfrøðiliga tilfeingið av svartkjafti í kannaða økinum er mettur til 1,74 milliónir tons. Tað er 17 prosent meira enn í fjør.

Í tali er vøksturin enn størri. Kanningin metir, at svartkjafturin í økinum telur 26,7 milliardir fiskar. Tað er 53 prosent meira enn í 2025.

Sterkir árgangir síggjast aftur

Svartkjafturin í kanningini er serstakliga merktur av ungum fiski. Kanningin vísir, at eitt og tvey ára gamal svartkjaftur fyllir nógv í kannaða økinum. Árgangirnir frá 2024 og 2025 síggja út til at vera sterkir.

Hetta kann fáa týdning fyri komandi stovnsmetingar, hóast kanningin ikki fevnir um allan svartkjaftastovnin.

Heitari sjógvur í Norskahavinum

Sjógvurin í Norskahavinum var í 2026 sum heild heitari enn langtíðarmiðalið fyri árini 1995 til 2021. Men myndin er ikki eins allastaðni. Í ein landnyrðing úr Føroyum var kaldari enn vanligt í fleiri á ymiskari dybd.

Kanningin bendir á, at heitari Atlantssjógvur rann inn í eystara part av Norskahavinum, meðan kaldari arktiskur sjógvur hevði størri ávirkan í øðrum økjum.

Fimm skip tóku lut í kanningini: Dana, Jákup Sverri, Þórunn Þórðardóttir, G.O. Sars og Resolute. Jákup Sverri kannaði økið frá 30. apríl til 12. mai.

Veðrið órógvaði partar av arbeiðinum, men sambært frágreiðingini ávirkaði tað ikki høvuðsúrslitini.