Urd Johannesen fekk M.A. Jacobsens virðisløn fyri barnamentan fyri bókina „Ferðin til Kongurvág“.

Bókin snýr seg um Ólav, sum er upptikin av Minecraft, men sum samstundis stríðist við ótta og marru.

Í talgilda heiminum hevur hann tamarhald á støðuni, men í sínum egna innara heimi er støðan ein onnur. Tá ein eiturkoppur byrjar at tosa, verður latið upp fyri einum hugflogsríkum heimi, har Ólavur verður noyddur at standa ímóti tí, sum ræðir hann.

Dómsnevndin sigur, at bókin flættar Minecraft, hugflog og barnsins innara lív saman og vísir, at dirvi ikki merkir at vera uttan ótta, men at halda fram hóast óttan.

Silja Eystberg hevur myndprýtt bókina, sum varð útgivin 27. august í ár.