Vegurin við Vága Floghavn er aftur opin fyri ferðslu frá mánadegnum 26. oktober, eftir at arbeiðið við einum nýggjum gongutunli undir vegnum er komið væl áleiðis.

Men arbeiðið ávirkar framvegis ferðsluna á parkeringsøkjunum.

Eingin gjøgnumkoyring í fimm vikur

Sambært Vága Floghavn verður fyribils ikki koyrandi millum parkeringsøkini P3, sum er ætlað leigubilum, og P4, sum er alment parkeringsøki.

Avmarkingin verður væntandi galdandi til 30. november.

Tað verður tó framvegis møguligt at koyra inn á og út av báðum parkeringsøkjunum, og løðistøðirnar verða eisini atkomiligar.

Nýggjur tunnil undir vegnum

Seinastu tveir mánaðirnar hevur verið arbeitt við einum gongutunli, sum skal binda verandi parkeringsøki saman við økinum, har parkeringsplássini verða víðkað.

Arbeiðið við tunlinum undir sjálvum vegnum er liðugt, men arbeiðið heldur fram við síðuna av vegnum.

Arbeiðsøkið verður avbyrgt við betongklossum og merkt við skeltum og ljósum.

Vága Floghavn heitir á bilførarar um at vísa varsemi.