Endamálið við degnum var at seta fokus á trivnað, samskifti og sálarligt arbeiðsumhvørvi hjá teimum, sum arbeiða tætt saman við børnum og familjum hvønn dag. Á skránni vóru faklig upplegg, kjak og bólkaarbeiði við støði í gerandisdegnum á dagstovnunum.

Fokus á trivnað og samstarv

Undirvísari á degnum var sálarfrøðingurin Kristian Eli Andersen, sum hevur serkunnleika innan kognitiva og metakognitiva terapi. Sambært kommununi legði hann dent á praktisk amboð og ítøkilig ráð, ið starvsfólk kunnu brúka beinleiðis í arbeiðinum og í samstarvinum við børn, foreldur og starvsfelagar.

Kommunan vil raðfesta góð arbeiðskor

Við ráðleggingardegnum ynskir Vága kommuna framhaldandi at raðfesta trivnað og góð arbeiðskor hjá starvsfólkunum á dagstovnaøkinum. Kommunan vísir á, at starvsfólkini hava eina týðandi uppgávu við at skapa tryggar og mennandi karmar fyri børnini.